საქართველოს ეკონომიკური განვითარების სამინისტრო > სამინისტროს შესახებ

ეკონომიკისა და მდგრადი განვითარების სამინისტროს მისიაა ქვეყნის ეკონომიკის მაღალი ზრდის ტემპებისა და მდგრადი განვითრების უზრუნველყოფის მიზნით ეფექტური ეკონომიკური პოლიტიკის შემუშავება და განხორციელება.

ქვეყნის მომავალი განვითრების ძირითადი დებულებები და მიმართულებები განსაზღვრულია საქართველოს მთავრობის სამოქმედო პროგრამაში “ერთიანი საქართველო სიღარიბის გარეშე”, ხოლო პროგრამის შესრულებისათვის საჭირო შედეგებზე ორიენტირებული კონკრეტული ღონისძიებები გაწერილია საქართველოს მთავრობის საშუალოვადიან სტრატეგიულ დოკუმენტში - ”ძირითადი მონაცემები და მიმართულებები 2010-2013 წლებისათვის” და შესაბამისად, სხვადასხვა სახელმწიფო პროგრამაში.

საქართველოს ხელისუფლების ეკონომიკური განვითარების პოლიტიკის მიზანია მდგრადი ეკონომიკური განვითარების უზრუნველყოფა, რომელიც დაფუძნებული იქნება სტაბილურ მაკროეკონომიკურ პოლიტიკაზე და კერძო მეწარმეობის განვითარებაზე. ქვეყნის ხელისუფლება ახორციელებს თანმიმდევრულ სტრუქტურულ და ინსტიტუციურ რეფორმებს, რომელთა მიზანია მეწარმეებისათვის მაქსიმალურად ხელსაყრელი ბიზნეს-გარემოს შექმნა.

შესაბამისად, ქვეყანაში მიმდინარე ეკონომიკური რეფორმები მიმართულია:

• სამეწარმეო საქმიანობის ლიბერალიზაციის, კერძო მეწარმეობისათვის ხელშემწყობი გამჭვირვალე და სტაბილური საკანონმდებლო ბაზის შექმნისა და სტაბილური და მიმზიდველი სამეწარმეო და საინვესტიციო გარემოს ჩამოყალიბებისკენ;
• აქტიური პრივატიზაციის პროცესის განხორციელებისა და ძლიერი კერძო სექტორის შექმნის ხელშეწყობისკენ;
• ბაზარზე ჯანსაღი კონკურენციის ხელშეწყობისა და ადმინისტრაციული ბარიერების მოხსნისკენ;
• ტურისტული, სატრანსპორტო და კავშირგაბმულობის ინფრასტრუქტურის განვითარებისა და ქვეყნის სატრანზიტო პოტენციალის ზრდის ხელშეწყობისკენ;
• საიმპორტო ტარიფების ლიბერალიზაციისა და ქვეყნის საექსპორტო პოტენციალის განვითარების ხელშეწყობისკენ;
• საქართველოს რეგიონებისა და პოსტკონფლიქტური ტერიტორიების რეაბილიტაციისა და ეკონომიკური განვითარებისკენ.

აღნიშნული რეფორმების წარმატებით განხორციელება შედეგად გამოიღებს ქვეყნის მთლიანი შიდა პროდუქტის სტაბილურ ზრდას, კერძო სექტორში ახალი სამუშაო ადგილების შექმნას, ქვეყნის ეკონომიკაში ინვესტიციების მოზიდვას, მოსახლეობის კეთილდღეობის ზრდას და სიღარიბის დონის შემცირებას, რაც ქვეყნის პოლიტიკური და სოციალურ-ეკონომიკური განვითარების დაჩქარებისა და ევროატლანტიკურ სტრუქტურებში ინტეგრირების მნიშვნელოვან წინაპირობებს წარმოადგენს.

ეკონომიკისა და მდგრადი განვითარების სამინისტრო აქტიურად თანამშრომლობს საერთაშორისო ორგანიზაციებთან და თავის საქმიანობაში ეყრდნობა გამჭვირვალობის და ანგარიშვალდებულობის პრინციპებს.