საქართველოს ეკონომიკური განვითარების სამინისტრო > სიახლეები
ეკონომიკური განვითარების სამინისტროს ტურიზმისა და კურორტების დეპარტამენტის საინფორმაციო ცენტრში საქართველოში შიდა ტურიზმის სამომხმარებლო კვლევის შედეგების პრეზენტაცია გაიმართა. ღონისძიება ტურიზმისა და კურორტების დეპარტამენტის თავმჯდომარემ ზაალ აბაზაძე გახსნა.
შიდა ტურიზმის ამ მასშტაბისა და ხასიათის კვლევა პირველი პრეცენდენტია საქართველოში და მას უდიდესი მნიშვნელობა აქვს ტურისტული ბიზნესის წარმომადგენლებისთვის, რათა ამ მიმართულებით სწორად წარმართონ მარკეტინგული სტრატეგია.
კვლევა ჩაატარა სოციოლოგიური კვლევის ჯგუფმა BCG Research-მა საქართველოს ეკონომიკური განვითარების სამინისტროს ტურიზმისა და კურორტების დეპარტამენტის დაკვეთით. კვლევა 6 კვირის განმავლობაში (2009 წლის 4 ნოემბრიდან -16 დეკემბრამდე) მიმდინარეობდა და მისი სამიზნე ჯგუფი იყო 1000 ოჯახი თბილისში, სულ 3382 რესპონდენტი.
კვლევის შედეგად მოხდა შიდა ტურისტული ბაზრის ტენდენციების შესწავლა.
როგორც ტურიზმისა და კურორტების დეპარტამენტის უფროსის მოადგილემ, ბექა ჯაყელმა აღნიშნა, შიდა ტურიზმის ბაზრის განვითარების პერსპექტივების მიმართულებით, რამდენიმე საინტერესო ტენდენცია გამოიკვეთა.
კერძოდ, 2010 წელს შიდა ტურისტთა ნაკადი გაიზრდება როგორც ზამთრის, ისე ზაფხულის კურორტების კუთხით. ამასთან, მზარდი მოთხოვნილებაა მოკლევადიან (რამდენიმედღიან) და თემატურ ტურებზე, მათ შორის კულტურულ, სათავგადასავლო, რელიგიურ და ა.შ. მზარდი ტენდენცია შეინიშნება ქვეყნის ისტორიული კუთხეების მონახულების მსურველთა მხრივაც.
საქართველოში შიდა ტურიზმისთვის ყველაზე აქტიური პერიოდია აგვისტო-ოქტომბერი, ზღვისპირა კურორტებზე დასვენებას დამსვენებელთა 25 % ამჯობინებს, თითქმის 20 % კი დასასვენებლად სამთო კურორტებს არჩევს. საერთო ჯამში კვლევამ დაადასტურა, რომ შიდა ტურიზმი საქართველოში მზარდი სეგმენტია, რომელიც 2010 წელს გასულ წლებთან შედარებით კიდევ უფრო პოპულარული გახდება.
