ნათია თურნავა ტყიბულში მეშახტეებსა და კომპანია „საქნახშირის“ წარმომადგენლებს შეხვდა
26-09-2019

ეკონომიკისა და მდგრადი განვითარების მინისტრი ნათია თურნავა პრემიერ-მინისტრ გიორგი გახარიას დავალებით ტყიბულში გაფიცულ მეშახტეებსა და კომპანია „საქნახშირი“ წარმომადგენლებს შეხვდა. 

შეხვედრის შედეგად, გაფიცულმა მეშახტეებმა აქციები შეწტვიტეს, კომპანია „საქნახშირმა“ კი ახალი ინვესტორი წარადგინა. 
 
„მივაღწიეთ ძალიან დადებით შედეგს. პირველ რიგში, დავიწყებ იმით, რომ მეშახტეების გაფიცვა შეწყდა. ინვესტორი კომპანია, რომელიც ტყიბულში შემოდის, საქმიანობას განაახლებს,  მეშახტეებთან ერთად დაიწყებს შახტაში ჩასვლას და არსებული ვითარების შესწავლას“ - ამის შესახებ ეკონომიკისა და მდგრადი განვითარების მინისტრმა ნათია თურნავამ ტყიბულში, გაფიცულ მეშახტეებთან და კომპანიის წარმომადგენლებთან შეხვედრის შემდეგ განაცხადა. 

ეკონომიკისა და მდგრადი განვითარების მინისტრის ინფორმაციით, კომპანია ასევე მზად არის, გაისტუმროს სახელფასო დავალიანება.  გარდა ამისა, კომპანიამ ვალდებულება აიღო,  გაისტუმროს გარკვეული სოციალური გადასახადები, მათ შორის დაზარალებული ოჯახებისთვის.

ამასთან, ნათია თურნავას ინფორმაციით, ნოემბრის დასაწყისში ქვანახშირის მოპოვება აღდგება. „ძალიან მნიშვნელოვანია, რომ გაჟღერდა გეგმა - პრაქტიკულად, ერთ თვეში, ნოემბრის დასაწყისში აღდგეს ქვანახშირის მოპოვება და ეს არის ძალიან დამაიმედებელი, რადგან ერთ წელზე მეტია, შახტა გაჩერებულია. უახლოესი 2 წლის განმავლობაში მოხდება შახტების, მოპოვების გაფართოება, გადაიარაღება და ახალ ნიშნულებზე ასვლა“ - განაცხადა ეკონომიკისა და მდგრადი განვითარების მინისტრმა. 


დაგვიკავშირდით

1403
2 99 11 11

შიდა აუდიტი

2 99 11 61
2 99 11 70

საქართველოს ეკონომიკისა და მდგრადი განვითარების სამინისტრო. 2021 ©