ნათია თურნავა კოლხეთის ეროვნულ პარკში გამართულ ღონისძიებას დაესწრო
27-07-2021

ეკონომიკისა და მდგრადი განვითარების მინისტრი ნათია თურნავა კოლხეთის ეროვნულ პარკში, UNESCO-ს კომიტეტის მიერ „საქართველოს კოლხური ტყეების და ჭარბტენიანი ტერიტორიებისთვის“ მსოფლიო ბუნებრივი მემკვიდრეობის სტატუსის მინიჭებასთან დაკავშირებით გამართულ ღონისძიებას დაესწრო. 

„ჩვენ კვლავაც წარმოვჩინდით მსოფლიო რუკაზე, როგორც ქვეყანა, რომელსაც აქვს უნიკალური ტრადიციები, უნიკალური ისტორია, უნიკალური ბუნება. ჩვენთვის ძალიან მნიშვნელოვანია, რომ  დღეს, როდესაც ჩვენი ქვეყანა, ისევე როგორც მსოფლიო ებრძვის პანდემიას და ტურიზმი განიცდის ყველაზე მეტ დარტყმას, ისეთი გადაწყვეტილებებით, როგორიც არის იუნესკოს მიერ საქართველოში ოთხი დაცული ტერიტორიის აღიარება, შევუქმნათ მომავალი ჩვენს ტურიზმს და შევქმნათ მისი ძალიან სწრაფი აღდგენის გარანტია“ - განაცხადა ნათია თურნავამ კოლხეთის ეროვნული პარკში გამართულ ღონისძიებაზე. ღონისძიება საქართველოს გარემოს დაცვისა და სოფლის მეურნეობის სამინისტროს ორგანიზებით გაიმართა, რომელიც მინისტრმა ლევან დავითაშვილმა გახსნა.

ნათია თურნავამ სიტყვით გამოსვლისას აღნიშნა, რომ სამთავრობო გუნდი, გარემოს დაცვისა და სოფლის მეურნეობის სამინისტრო, დაცული ტერიტორიების სააგენტო ძალიან ბევრ რამეს აკეთებენ იმისთვის, რომ დაცული ტერიტორიების ინფრასტრუქტურა განვითარდეს. მინისტრის შეფასებით, პირველ რიგში, ეს ნიშნავს სამუშაო ადგილებს იმ რეგიონებისთვის, იმ ადამიანებისთვის, რომლებიც ცხოვრობენ  ეროვნული პარკების მახლობლად და ქმნიან იმ გარემოს, რომლებსაც დიდი სიამოვნებით სტუმრობენ სხვადასხვა ქვეყნების ტურისტები. 

„ეს ნიშნავს ასევე ეკოტურიზმის განვითარებას. აღსანიშნავია, რომ პრემიერ-მინისტრის დავალებით ეკონომიკის სამინისტროს მიერ მომზადებული 10-წლიანი სტრატეგიის ერთ-ერთი ნაწილი მოიცავს სპეციალური მხარდაჭერის პროგრამებს ეკო და აგროტურიზმისთვის. ესაა გრანტებისა და სესხების სუბსიდირების პროგრამები, რომლებიც კიდევ უფრო მეტად დაეხმარება ადგილობრივ მოსახლეობას, რომ ასეთი უნიკალური ბუნების ძეგლების ირგვლივ გააშენოს მცირე სასტუმროები, მცირე ფერმერული მეურნეობები, მცირე კვების ობიექტები, რაც ჩვენთან საერთაშორისო ვიზიტორებს მოიზიდავს“ - აღნიშნა ნათია თურნავამ.

პირველად საქართველოს ისტორიაში ჩვენი ქვეყნის ოთხ დაცულ ტერიტორიას მსოფლიო ბუნებრივი მემკვიდრეობის სტატუსი მიენიჭა - კოლხეთისა და მტირალას ეროვნული პარკები, ასევე ქობულეთისა და კინტრიშის დაცული ტერიტორიები UNESCO-ს მსოფლიო ბუნებრივი მემკვიდრეობის ნუსხაში შევიდა.
 


დაგვიკავშირდით

1403
2 99 11 11
2 99 11 70

შიდა აუდიტი

2 99 11 61
2 99 11 70

საქართველოს ეკონომიკისა და მდგრადი განვითარების სამინისტრო. 2021 ©