ნათია თურნავა - არაბთა გაერთიანებული საამიროების რამდენიმე საინვესტიციო ფონდი საქართველოში წარმოებით დაინტერესდა
21-09-2021

საქართველოს ეკონომიკისა და მდგრადი განვითარების მინისტრმა ნათია თურნავამ არაბთა გაერთიანებულ საამიროებში სამუშაო ვიზიტის ფარგლებში აბუ-დაბისა და დუბაიში შეხვედრები გამართა საამიროების ისეთ წამყვან საინვესტიციო ფონდებთან და კორპორაციებთან, როგორებიცაა „აბუ დაბის განვითარების ფონდი“, „მუბადალა“, „ლულუ გრუპ ინტერნეშენალი“, „დუბაი ჰოლდინგი“, „დუბაი ინვესტმენტი“, „დუბაის საინვესტიციო კორპორაცია“, „არმადა ჯგუფი“ და ADIA (Abu Dhabi Investment Authority).

ეკონომიკისა და მდგრადი განვითარების მინისტრის ინფორმაციით, შეხვედრებზე საუბარი შეეხო საქართველოს საინვესტიციო პოტენციალს სხვადასხვა სექტორში. კერძოდ, ნათია თურნავას განცხადებით, „დუბაი ინვესტმენტ ფონდი“-ს მხრიდან გამოითქვა დაინტერესება საქართველოში რამდენიმე სექტორში წარმოების მიმართულებით. 

„ეს შეეხება ინდუსტრიულ პარკებს, მათ აქვთ დიდი გამოცდილება და სურვილი, საქართველოში გააფართოვონ თავისი წარმოება ფარმაცევტულ, საშენ მასალათა და ელექტრომოწყობილობების მიმართულებით. ასევე ბევრი სხვა მიმართულებაა, რომლებიც უკვე შემდგომ გამოიკვეთება ერთობლივი მუშაობის შედეგად“ - აღნიშნა ეკონომიკისა და მდგრაი განვითარების მინისტრმა. 

ამასთან, ნათია თურნავას თქმით, არაბთა გაერთიანებული საამიროების რამდენიმე მსხვილ საინვესტიციო ფონდთან მიღწეულია შეთანხმება და დაიგეგმა მათი კონსულტანტების და კომპანიების დელეგაციების საქართველოში ვიზიტები, რომელთა ფარგლებშიც ისინი ადგილზე გაეცნობიან ჩვენი ქვეყნის საინვესტიციო შესაძლებლობებს.  

„რამდენიმე საინვესტიციო ფონდთან მივაღწიეთ შეთანხმებას კონკრეტულ სექტორებში, რომ საქართველოში გამოუშვებენ კონსულტანტებს, სამუშაო ჯგუფებს, ასევე წინასწარ მოხდება მემორანდუმების გაცვლა და მუშაობას დავიწყებთ ცალკეულ პროექტებზე. კერძოდ, ეს შეეხება განახლებად ენერგიას - განსაკუთრებით დიდი გამოცდილება აქვთ აქაურ ინვესტორებს და მსხვილ საინვესტიციო ფონდებს მზის ენერგიის გამოყენებაში. ეს ასევე შეეხება უძრავ ქონებას, სტუმარ-მასპინძლობის ინდუსტრიას. ჩვენ გვაქვს ძალიან ბევრი საინტერესო პროექტი, რომელთაც მათ ვთავაზობთ და ამ კუთხითაც დაიწყება თანამშრომლობა“, - განაცხადა ნათია თურნავამ


დაგვიკავშირდით

1403
2 99 11 11
2 99 11 70

შიდა აუდიტი

2 99 11 61
2 99 11 70

საქართველოს ეკონომიკისა და მდგრადი განვითარების სამინისტრო. 2021 ©