ნათია თურნავა იტალიური პურისა და სხვადასხვა ნახევარფაბრიკატის საწარმო „რომივერია“-ს გახსნას დაესწრო
01-10-2021

"მცირე ბიზნესი ყველაზე კარგი გამტარია ეკონომიკური ზრდისა და სიღარიბის დაძლევის ამოცანებს შორის, მცირე ბიზნესი არის გარანტია, რომ შემოსავალი, რომელიც შიდა თუ გარე ბაზარზე  პროდუქციის რეალიზაციით შემოვა, უფრო მეტად გადანაწილდება ადამიანების, ოჯახების სასარგებლოდ, აქედან გამომდინარე, ძალიან მიხარია, რომ ეს შესანიშნავი საწარმო შეიქმნა და მაქვს იმედი, რომ ამას არსებულმა, კარგმა საინვესტიციო გარემომ შეუწყო ხელი - განაცხადა ეკონომიკისა და მდგრადი განვითარების მინისტრმა ნათია თურნავამ თბილისში, საწარმო „რომივერია“-ს გახსნის ღონისძიებაზე. 

“რომივერია” სხვადასხვა სახეობის იტალიურ ბრტყელ პურს, პიადინას და ასევე ნახევარფაბრიკატებს აწარმოებს. საწარმო პროდუქციის რეალიზაციას როგორც შიდა, ასევე საექსპორტო ბაზრებზე გეგმავს.

კომპანია „რომივერიას“ ჯამური ინვესტიცია 1.000.000 ევროს აღწევს, ობიექტზე კი დასაქმებული იქნება 35 ადამიანი. საწარმოში  ინტეგრირებულია ISO:22000 და HACCP ის სისტემები, ასევე, სრულად არის გათვალისწინებული სურსათის ეროვნული სააგენტოს მიერ გაცემული მითითებები. 

„რომივერია“ აღჭურვილია საერთაშორისო დონის დანადგარებით, რომლებიც ფლობენ სერტიფიკატს - EURO-1.

მინისტრის შეფასებით, საქართველოს საექსპორტო კომპანიების უმეტესობა სწორედ მცირე და საშუალო ბიზნესია და მნიშვნელოვანია, რომ მცირე ბიზნესი ექსპორტზე გასვლის შესაძლებლობას ავლენს.

„ჩვენ ბიზნესის დახმარების ძალიან ბევრი პროგრამა გვაქვს, გვქონდა  პრეზენტაცია და გავაცანით საზოგადოებას, რომ ბოლო შვიდი წლის განმავლობაში 1806 ბენეფიციარი დაფინანსდა სახელმწიფოს მიერ და ეს მონაცემები ინტერაქტიულ რუკაზეც იქნება გამოქვეყნებული. ჯერჯერობით, თქვენს კომპანიას არ გისარგებლიათ ჩვენი პროგრამებით, თუმცა, როდესაც თქვენი საწარმო  განვითარდება, გაფართოვდება, დივერსიფიკაციას მოახდენთ, ახალ პროდუქციას გამოუშვებთ და ახალ ბაზრებზე გახვალთ, არ დაგავიწყდეთ, რომ ამ დროს თქვენს გვერდით არის ეკონომიკის სამინისტრო, ჩვენი სახელმწიფო პროგრამები და თუ დაგჭირდებათ გადაიარაღება, გაფართოება, მარკეტინგული თანადგომა თუ ექსპორტში დახმარება - მოგვაკითხეთ და სიამოვნებით დაგიდგებით გვერდში“ - აღნიშნა ნათია თურნავამ.

კომპანია „რომივერიას“ წარმომადგენლების ინფორმაციით, პირველ ეტაპზე საწარმო მომხმარებელს სხვადასხვა სახეობის იტალიურ ბრტყელ პურს, პიადინას შესთავაზებს, მეორე ეტაპზე კი განხორციელდება ნახევარფაბრიკატების წარმოების პროექტი: ასორტიმენტში იქნება მზა სენდვიჩები, დაჭრილი ლორი და ყველი, ასორტი ღვინისთვის ქართული ყველით, ჩირეულით და თხილით.


დაგვიკავშირდით

1403
2 99 11 11
2 99 11 70

შიდა აუდიტი

2 99 11 61
2 99 11 70

საქართველოს ეკონომიკისა და მდგრადი განვითარების სამინისტრო. 2021 ©