ვებ-გვერდი მუშაობს სატესტო რეჟიმში

ინოვაციური ბიზნესის ხელშეწყობა

საქართველოს ინოვაციების და ტექნოლოგიების სააგენტო დაინტერესებულ პირებს სხვადასხვა უფასო მომსახურებას სთავაზობს. სააგენტო ტექნოპარკთან ერთად მოიცავს როგორც მცირე ინკუბატორებს, სასწავლო ცენტრებსა და ლაბორატორიებს, ისე დიდ ოფისებს კომპანიებისთვის, ერთობლივ სამუშაო ადგილებსა და რეკრეაციულ სივრცეს. პარკის ტერიტორიაზე მუშაობს მაღალტექნოლოგიური კომპანიების ტრენინგ-ცენტრები და შოუ-რუმები, სააგენტომ შექმნა მაღალტექნოლოგიური ინკუბატორი, სამრეწველო ინოვაციების უნივერსალური ლაბორატორია, საერთო სამუშაო სივრცე (co-working), საკონფერენციო დარბაზი და სხვა სერვისები, რომლებიც ხელს უწყობს მაღალტექნოლოგიური ინდუსტრიის განვითარებას.


ბიზნეს კონსალტინგი

ინოვაციების სააგენტომ ტექნოპარკში განათავსა საკონსულტაციო კომპანიების - „საქპატენტი“, „დელოიტი“, „მართვის აკადემია“ ოფისები, რომლებიც სტარტაპებს მომსახურებას უწევენ სხვადასხვა მიმართულებით: 

"საქპატენტი“  - უზრუნველყოფს სტარტაპების კონსულტაციებს საკუთრების დაცვის საკითხში. 

"დელოტი“ - ინოვატორებს ეხმარება ფინანსური საკითხების დაგეგმვასა და სამუშაო პროცესში წარმოქმნილი პრობლემების მოგვარებაში.

მართვის აკადემია - სტარტაპებს კონსულტაციას უწევს მარკეტინგისა და მენეჯმენტის მიმართულებით. 

მენტორთა ქსელი – ინოვაციების სააგენტომ შექმნა მენტორთა ქსელი, რომელიც აერთიანებს სხვადასხვა დარგის გამოცდილ, კვალიფიციურ პროფესიონალებს. 

მენტორები ყოველთვიურად უზიარებენ გამოცდილებას დამწყები, ინოვაციური ბიზნესების წარმომადგენლებს. 

მენტორთა ქსელის ეფექტურად მუშაობის მიზნით, სააგენტომ შექმნა სპეციალური გვერდი: http://gita.gov.ge/mentors/index.html, სადაც განთავსებულია მენტორების საკონტაქტო ინფორმაცია. ვებ-გვერდის საშუალებით, ერთის მხრივ სტარტაპებს შეუძლიათ აირჩიონ მენტორი, რომელთანაც კონულტაციის გავლის სურვილი აქვთ, ხოლო, მეორე მხრივ, დარგის პროფესიონალებსა და გამოცდილ ადამიანებს შეუძლიათ,  მენტორთა ქსელში დარეგისტრირდნენ და თავისი ცოდნა და გამოცდილება ინოვატორებს გაუზიარონ.

 

ტექნოლოგიურ, საგანმანათლებლო და პროფესიონალურ რესურსებზე წვდომა

ფაბლაბი
საქართველოს ინოვაციების და ტექნოლოგიების სააგენტო სტარტაპებს სთავაზობს სამრეწველო ინოვაციების ლაბორატორიის ქსელს - ფაბლაბი.

ფაბლაბი არის უნიკალური სივრცე ნებისმიერი მოქალაქისთვის, რომელსაც აქვს იდეა, სურს მისი განხორციელება ან სტარტაპ ბიზნესად ჩამოყალიბება. ფაბლაბი ყველას აძლევს საშუალებას, უფასოდ ჰქონდეს წვდომა თანამედროვე ტექნოლოგიებზე, ის მორგებულია ნებისმიერ მომხმარებელზე და ხელს უწყობს იდეების გენერირებას. ამ სივრცეებში ხდება ახალი წამოწყებების სრულყოფა და ახალგაზრდა ინოვატორების იდეების რეალიზება. 

ფაბლაბის მიზანია, მსოფლიოს შესთავაზოს ცოდნაზე დაფუძნებული ეკონომიკის მშენებლობის უნიკალური მოდელი. მისი განვითარება მნიშვნელოვანია ახალი სტარტაპ ბიზნესების ჩამოსაყალიბებლად.

არსებული ფაბლაბები, როგორც თბილისის, ისე რეგიონების მასშტაბით აღჭურვილია ზუსტად იმ აპარატურული ციკლით, რომლის ანალოგებიც მასაჩუსეთის ტექნოლოგიურ უნივერსიტეტში - MIT-შია. 

სამრეწველო ინოვაციების ლაბორატორია ულტრათანამედროვე აპარატურას გვთავაზობს, რომელიც ახდენს ახალი წამოწყებების სრულყოფას და დამწყები ბიზნესმენების პროექტების განვითარებას. 

3D პრინტერი პროგრამირებადი დანადგარი ინოვატორებს საშუალებას აძლევს შექმნან საკუთარი გამოგონებების პირველადი მუშა პროტოტიპები. დანადგარი პოლიმერული მასალისგან შეცხელება-შეწებების მეთოდით ქმნის ნებისმიერი სირთულის, 100% - იანი სიზუსტით შესრულებულ ნივთს.

ლაზერული მჭრელი – მოჭრა და გრავირება  ხეზე, ტყავზე, ორგანულ მინაზე, მეტალზე, მუყაოსა და სხვა ტიპის მრავალფეროვან მასალაზე. გამოიყენება როგორც სრულფასოვანი, მუშა, დახვეწილი დიზაინის პროტოტიპების შესაქმნელად, ასევე სხვადასხვა ზომის ნივთების საწარმოებლად. 

CNC რუტერი – 3D პროგრამირებადი ჩარხი. მუშაობს ხეზე, ორგანულ მინაზე, მეტალსა და სხვა ტიპის მყარ მასალებზე. რუტერი ხელოვანებსა და ინოვატორებს, ისეთი ტიპის პროტოტიპების შექმნის საშუალებას აძლევს, ისეთი სიზუსტით, რომლის შექმნაც ხელით შეუძლებელია, ან ძალიან დიდი დრო სჭირდება. დანადგარი ასევე გამოიყენება ყალიბების დასამზადებლად.

ვაკუმ ფორმირების აპარატი ამზადებს ნებისმიერი ტიპის ყალიბს. ინოვატორებს შესაძლებლობა აქვთ შემდგომი წარმოება უფასოდ განახორციელონ აღნიშნული ყალიბის დახმარებით.

PCB დანადგარი (პლატების საბეჭდი აპარატი) საქართველოში პირველად იძლევა ნებისმიერი ტიპის რთული პლატების დამზადების საშუალებას, რომლებიც ხელს შეუწყობს ბაზარზე მაღალტექნოლოგიური პროდუქტების ზრდას.

პროგრამირებადი საკერავი მანქანა – კომპიუტერში არსებული ნახატის, ან წარწერის  სხვადასხვა მატერიალებზე 100%-იანი სიზუსტით გადატანა. 

ფაბლაბში ასევე წარმოდგენილია: სასერი პლოტერები, სხვადასხვა ტიპის მყარ ზედაპირზე საბეჭდი დანადგარები და თერმული პრესები. დანარჩენ დანადგარებთან ერთად ეს ყველაფერი იძლევა იმის საშუალებას, რომ ფაბლაბში მოსულმა ინოვატორმა შეძლოს ტექნიკურად მუშა ან ვიზუალურად მაღალი დონის, ხარისხიანი პროტოტიპების დამზადება, რომლიც შესაძლებლობას მისცემს, მოიპოვოს დამატებითი დაფინანსება და მასიურ წარმოებაზე გადავიდეს.

ამ ეტაპზე ქვეყნის მასშტაბით 22 სამრეწველო ინოვაციების ლაბორატორიაა გახსნილი:

FabLab Tech Park – ქ.თბილისი, ტექნოპარკი, ინოვაციების ქ.7 
Fablab Tech Park – ქ.ზუგდიდი, ტექნოპარკი,  ზუგდიდის პრეზიდენტის ყოფილი რეზიდენცია.
FabLab TSU – ქ. თბილისი, უნივერსიტეტის ქ.2, თსუ–ს მაღლივი კორპუსი 
FabLab Iliauni – ქ.თბილისი, გიორგი წერეთლის ქ.3 
FabLab Art Academy – ქ.თბილისი, ყიფშიძის ქ.34, სამხატვრო აკადემიის III კორპუსი 
FabLab ATSU – ქ.ქუთაისი, თამარ მეფის ქ.59, აკაკი წერეთლის სახელობის უნივერსიტეტი 
FabLab BSU – ქ.ბათუმი, ფიროსმანის ქ.12. შოთა რუსთაველის სახელობის უნივერსიტეტი 
FabLab GTU – ქ.თბილისი, მერაბ კოსტავას ქ.68. საქართველოს ტექნიკური უნივერსიტეტი 
FabLab AISI - კაჭრეთი, პროფესიული სკოლა აისი
FabLab ახალი ტალღა - ქ.ქობულეთი, რუსთაველის ქ. 154
FabLab black sea - ქ.ბათუმი, ლერმონტოვის ქ. 84
FabLab EMISI - ქ.თბილისი, გურამ ფანჯიკიძის 1ა
FabLab ERQVANI - ქ.ამბროლაური ვაჟა-ფშაველას ქ. #10
FabLab GLDANI - ქ.თბილისი, გლდანი V მკ/რ, ხიზანიშვილის ქუჩა
FabLab IBERIA - ქ.ქუთაისი ზ.ანჯაფარიძის ქ–№61
FabLab LAKADA - ქ.წალენჯიხა, ქ.ჯვარი ყაზბეგის ქ.№ 2
FabLab MODUSI -ქ.რუსთავი, ჟიული შარტავას 4
FabLab OPIZARI -ქ.ახალციხე, რუსთაველის ქ.№106
FabLab PHAZISI - ქ.ფოთი, კონსტიტუციის ქუჩა 54
FabLab SPECTRI - ქ.თბილისი, ჭიჭინაძის ქ.№10
FabLab TETNULDI - ქ. მესტია, ერეკლე ფარჯიანის ქ.№25

 

მაღალტექნოლოგიური შოურუმი

საქართველოს ინოვაციების და ტექნოლოგიების სააგენტომ ტექნოპარკში განათავსა შოურუმი, რომელშიც წარმოდგენილია უახლესი, მაღალტექნოლოგიური ტექნიკა. 

სივრცე აღჭურვილია გრაფიკული სამუშაოების, ვირტუალური რეალობის, Android, IOS, windows-ის desktop, web და mobile აპლიკაციების სატესტოდ საჭირო მოწყობილობებით.  

შოურუმში სტარტაპებს აქვთ შესაძლებლობა, აღნიშნული ტექნიკის გამოყენებით უფასოდ დატესტონ თავიანთი პროდუქტი  და შექმნან პროტოტიპები.  

 

საერთო სამუშაო სივრცე
ინოვაციების სააგენტო სტარტაპებს უფასოდ სთავაზობს საერთო სამუშაო სივრცეს, ე.წ. co-working-ს, სადაც ბიზნესინკუბატორის გუნდებს, ტექნოპარკის წევრებსა და დამწყებ კომპანიებს შეუძლიათ, განთავსდნენ და ამავდროულად ტექნოპარკისა და სააგენტოს სხვადასხვა მომსახურებებით ისარგებლონ. 

საერთო სამუშაო სივრცეში სტარტეპერები ისარგებლებენ საუკეთესო გამოსახულების მონიტორებით, მაღალი წარმადობის პრინტერებით, პერსონალური პროფესიონალური კომპიუტერებით  და სხვა თანამედროვე ტექნოლოგიური დანადგარებით.

 

საკონფერენციო დარბაზი
ტექნოპარკი დაინტერესებულ პირებს, ასევე სთავაზობს საკონფერენციო დარბაზით სარგებლობას. დარბაზი აღჭურვილია საკონფერენციო აპარატურით: გახმოვანების სისტემით, პროექტორითა და  ეკრანით.

საკონფერენციო დარბაზი მუდმივი დატვირთვით მუშაობს, იტევს დაახლოებით 230 ადამიანს, მასპინძლობს როგორც შიდა ღონისძიებებს, ისე სხვადასხვა კომპანიებსა თუ ორგანიზაციებს. აღნიშნული სერვისით სარგებლობისთვის საჭიროა ტექნოპარკის საიტზე რეგისტრაცია. მომსახურება ყველასთვის ფასიანია, გარდა სტარტაპ კომპანიებისა, რომლებიც საკონფერენციო სივრცით უფასოდ სარგებლობენ და საშუალება ეძლევათ ჩაატარონ პრეზენტაციები თუ სხვადასხვა სახის ღონისძიება, რაც დამწყები ბიზნესების ერთგვარი ხელშეწყობაა.

 

ტრენინგები
ინოვაციების და ტექნოლოგიების სააგენტო, საინფორმაციო ტექნოლოგიების მიმართულებით ტრენინგების მასშტაბურ ციკლს აფინანსებს.

სპეციალისტებს უფასოდ უტარდებათ ტრენინგები  ვებ და მობილური აპლიკაციების საფუძვლებში. მათ საბაზისო ცოდნას მიღების საშუალება აქვთ შემდეგი მიმართულებებით: IT პროექტის მენეჯმენტი; IT პროექტების მართვა; PYTHON პროგრამირება; IOS პროგრამირება. ტრენინგები ტარდება საქართველოს უნივერსიტეტში, შავი ზღვის საერთაშორისო უნივერსიტეტში, თბილისისა და ზუგდიდის ტექნოპარკებში, ასევე რამდენიმე საჯარო სკოლაში. 
 

ტრენინგების პროგრამის მიზანი საინფორმაციო ტექნოლოგიების სფეროში კონკურენტუნარიანი პოტენციალის მქონე ადამიანების ხელშეწყობაა საერთაშორისო ბაზარზე. პროექტი ეხმიანება საქართველოს მთავრობის სტრატეგია - 2020-ს, რომლის ფარგლებშიც 2020 წლისთვის, ქვეყნის მასშტაბით 40 000 IT სპეციალისტი უნდა მომზადდეს.

უფასო ტრენინგების ციკლი IT კომპანიებს შემდგომში პროფესიონალი კადრების მოძიებაშიც დაეხმარება. საბოლოოდ ეს პროცესი ხელს შეუწყობს ქვეყანაში მომავლის პროფესიების დამკვიდრებას.  

ტრენინგების გასავლელად საჭიროა რეგისტრაცია სააგენტოს მიერ შემუშავებული სააპლიკაციო ფორმის მეშვეობით. რომელსაც ტექნოპარკის საიტზე იხილავთ.

 

საკონტაქტო ინფორმაცია:

საქართველოს ეკონომიკისა და მდგრადი განვითარების სამინისტროს სსიპ საქართველოს ინოვაციების და ტექნოლოგიების სააგენტო

მისამართი: ქ. თბილისი, ოქროყანა, ინოვაციების ქ. N7

ტელ.:+995 599 986 499

E-mail: info@gita.gov.ge

ვებგვერდი: www.techpark.ge 

www.facebook.com/techpark



დამატებით ამ თემაზე
დაგვიკავშირდით

2 99 11 11

შიდა აუდიტი

2 99 11 61

საქართველოს ეკონომიკისა და მდგრადი განვითარების სამინისტრო. 2017 ©