საქართველოს
ეკონომიკისა და მდგრადი განვითარების
სამინისტრო

ფრანგული საავიაციო გიგანტის, Groupe ADP-ის წევრი, TAV Airports 2026-2028 წლებში თბილისის საერთაშორისო აეროპორტის გაფართოებასა და განვითარებაში 150 მილიონ აშშ დოლარზე მეტ ინვესტიციას განახორციელებს, რომლის მეშვეობითაც თბილისის საერთაშორისო აეროპორტის გამტარუნარიანობა 10 მილიონ მგზავრამდე გაიზრდება.  

როგორც ეკონომიკისა და მდგრადი განვითარების მინისტრმა, მარიამ ქვრივიშვილმა თბილისის საერთაშორისო აეროპორტის გაფართოების პროექტის დაწყებისადმი მიძღვნილ ღონისძიებაზე სიტყვით გამოსვლისას განაცხადა, თბილისის საერთაშორისო აეროპორტი მხოლოდ სატრანსპორტო ინფრასტრუქტურა არ არის.

„ეს არის საქართველოს ეკონომიკური ზრდის, ტურიზმის განვითარების, ინვესტიციების მოზიდვის, ვაჭრობისა და ქვეყნის საერთაშორისო მიმოსვლის გაფართოების ერთ-ერთი მთავარი საყრდენი. სწორედ ამიტომ, მისი განვითარება სახელმწიფოსთვის სტრატეგიული მნიშვნელობის ამოცანაა. მოხარული ვართ, რომ ჩვენი მრავალწლიანი თანამშრომლობა მსოფლიოს ერთ-ერთ წამყვან საავიაციო ჯგუფთან - Groupe ADP-სთან, რომლის შემადგენლობაშიც TAV Airports-ი შედის, დღეს განვითარების ახალ ეტაპზე გადადის.

სახელმწიფოსთვის ტრანსპორტისა და ლოგისტიკის სექტორის განვითარება ერთ-ერთი მნიშვნელოვანი პრიორიტეტია, სადაც ქვეყნის ეკონომიკური ზრდის, საერთაშორისო დაკავშირებადობისა და სატრანზიტო პოტენციალის გაძლიერებაში მნიშვნელოვანი როლი საავიაციო სექტორს უჭირავს. ავიაცია პირდაპირ უწყობს ხელს ტურიზმის განვითარებას, ინვესტიციების მოზიდვას, ვაჭრობის გაფართოებას, ბიზნესის გაძლიერებასა და ახალი სამუშაო ადგილების შექმნას. სწორედ ამიტომ, ბოლო წლებში სახელმწიფომ მნიშვნელოვანი ძალისხმევა მიმართა საქართველოს საავიაციო ბაზრის გაფართოებისკენ“, - აღნიშნა ეკონომიკისა და მდგრადი განვითარების მინისტრმა.

მარიამ ქვრივიშვილის განცხადებით, ბოლო ხუთი წლის განმავლობაში საქართველოს ავიაბაზარზე ოპერირება 43-მა ახალმა ავიაკომპანიამ დაიწყო.

„მიმდინარე წელს, პირველად ისტორიაში დანიის სამეფოსა და საქართველოს დედაქალაქები ერთმანეთს პირდაპირი საჰაერო გზით დაუკავშირდნენ და საქართველოს ავიაბაზარზე ავიაკომპანია  „ნორვეგიის ავიახაზები“ შემოვიდა. სულ რაღაც 2 დღეში კი, საქართველოში ოპერირებას მესამე უმსხვილესი ჩინური ავიაკომპანია China Eastern დაიწყებს და თბილისსა და შანხაის შორის პირდაპირ ფრენებს კვირაში სამჯერ შეასრულებს. დღეს საქართველოს ავიაბაზარზე, ისტორიული მაქსიმუმით, 85 ავიაკომპანია ოპერირებს, რომლებიც ფრენებს 125 მიმართულებით ასრულებენ. ეს ქმნის მეტ ხელმისაწვდომობას, აძლიერებს კონკურენციას და ხელს უწყობს ჩვენი ქვეყნის ტურიზმის სექტორის მდგრად და დივერსიფიცირებულ განვითარებას.

რეგიონში არსებული გეოპოლიტიკური ვითარებიდან გამომდინარე, 2026 წელი არაერთი გამოწვევით არის სავსე, მათ შორის ავიაციისა და ტურიზმის სექტორისთვის. თუმცა, სწორედ ასეთ გარემოში განსაკუთრებით მნიშვნელოვანია, რომ საქართველო ინარჩუნებს ზრდის მაღალ ტემპს და საერთაშორისო პარტნიორების ნდობას. ამაზე მეტყველებს ბოლო პერიოდის მონაცემებიც“, - განაცხადა მარიამ ქვრივიშვილმა.

მინისტრმა აღნიშნა, რომ მხოლოდ ივნისში საქართველოს აეროპორტები, ჯამურად, თითქმის 788 ათას მგზავრს მოემსახურა, რაც გასული წლის ანალოგიურ პერიოდთან შედარებით 4%-იანი ზრდაა. ასევე, ბათუმის საერთაშორისო აეროპორტში მგზავრთნაკადი გასულ თვეს 3%-ით გაიზარდა.

მარიამ ქვრივიშვილის თქმით,  საქართველოს აეროპორტების მგზავრთნაკადის შთამბეჭდავი შედეგების ეფექტი ტურიზმის სექტორის წარმატებაზეც აისახა.

ღონისძიებას საქართველოს პრემიერ მინისტრი ირაკლი კობახიძე და აღმასრულებელი და საკანონმდებლო ხელისუფლების და TAV Airports-ის წარმომადგენლები ესწრებოდნენ.

ღონისძიების დასასრულს სიმბოლური კაფსულის ჩადების ცერემონია გაიმართა.