საქართველოს
ეკონომიკისა და მდგრადი განვითარების
სამინისტრო

2026 წლის II კვარტალში, ქვეყანაში მაღალი ეკონომიკური აქტივობის პარალელურად, შრომის ბაზარზე პოზიტიური დინამიკა შენარჩუნდა. დაქირავებით დასაქმებულთა საშუალო თვიური ნომინალური ხელფასი გასული წლის ანალოგიურ პერიოდთან შედარებით 8.0%-ით (177.3 ლარით) გაიზარდა და 2,389.3 ლარს გაუტოლდა, რაც II კვარტლის რეკორდული მაჩვენებელია.

ხელფასების მატება დაფიქსირდა თითქმის ყველა ეკონომიკურ სექტორში.  საფინანსო და სადაზღვევო სექტორებში  საშუალო თვიური ნომინალური ხელფასი გაიზარდა 9.2%-ით, პროფესიული, სამეცნიერო და ტექნიკური საქმიანობებში კი ზრდამ 10.3% შეადგინა.

რაც შეეხება სამთომოპოვებით მრეწველობას  II კვარტალში  საშუალო თვიური ნომინალური ხელფასის ზრდა  9.1% იყო, ხოლო ჯანდაცვის სექტორში 12.7%.

ინფორმაცია და კომუნიკაციის სექტორში ნომინალური ხელფასის ზრდამ 5.4% შეადგინა, ხოლო ტრანსპორტი და დასაწყობების მიმართულებით 9.0%.

12.5%-ით გაიზარდა საშუალო თვიური ნომინალური ხელფასი  განთავსების საშუალებებით უზრუნველყოფის და საკვების მიწოდების საქმიანობებში,  წყალმომარაგება და ნარჩენების მართვის მიმართულებით კი ზრდა 14.0%-ის დონეზე იყო.

 ხელოვნების, გართობის და დასვენების სექტორში II კვარტალში საშუალო თვიური ნომინალური ხელფასი 9.2%-ით, ხოლო ელექტროენერგიის, აირის, ორთქლის და კონდიცირებული ჰაერის მიწოდების მიმართულებით ზრდამ 6.2% შეადგინა.

ადმინისტრაციული და დამხმარე მომსახურების საქმიანობებში საშუალო თვიური ნომინალური ხელფასის ზრდა 8.7%-ის დონეზე დაფიქსირდა, ხოლო დამამუშავებელი მრეწველობის სექტორში 6.2%-ით.

აღსანიშნავია, რომ  ხელფასების ზრდა დაფიქსირდა როგორც ბიზნეს, ასევე არასამეწარმეო და საფინანსო სფეროში. ბიზნეს სექტორში დასაქმებულების ხელფასი 2026 წლის  II კვარტალში წინა წლის შესაბამის პერიოდთან შედარებით 6.6%-ით  გაიზარდა და 2,471.5 ლარი შეადგინა, ხოლო არასამეწარმეო და საფინანსო სფეროში დასაქმებულების ხელფასი 10.6%-ით გაიზარდა და 2,239.0 ლარი შეადგინა.

საქართველოს მთავრობის მიერ ეკონომიკის მხარდაჭერის მიზნით განხორციელებული ღონისძიებები ხელს უწყობს ეკონომიკური აქტივობის და შრომის ბაზრის გაჯანსაღებას და შესაბამისად, პოზიტიურად აისახება დაქირავებით დასაქმებულთა ხელფასებზეც.